Президентга Тошкентдаги “Дўстлик” ва “Қодирий” боғларини реконструкция қилиш концепциялари тақдим этилди.

---

Дўстлик боғи

Боғда сайр йўлаклари, ҳовузлар, дам олиш масканлари реконструкция қилинади, янги ўриндиқлар ўрнатилади. Оилавий кўнгилочар зона, болалар ижод маркази, скейтда учиш майдони, ҳаво кемаси ва чархпалак ташкил қилинади.

Боғ ҳудудида Миллатлараро муносабатлар ва хорижий давлатлар билан дўстлик алоқалари қўмитаси жойлашган. Унга туташ майдонда миллий маданият марказлари павилёнларини ўрнатиш режалаштирилган. Ҳар бир павильон ўзи вакиллик қиладиган халқнинг ўзига хос маданияти ва анъаналарини акс эттирувчи услубда ишлаб чиқилади. Павилёнлар “Дўстлик” боғи ансамбли билан уйғун бўлади.

Реконструкциядан сўнг боғда ташриф буюрувчилар тинч дам олишини таъминлаш учун велосипед ва мотоциклларда юришни тақиқлаш режалаштирилган. Шунингдек, лойиҳа бошқа ўзгартиришларни ҳам назарда тутади:

• марказий хиёбонни кенгайтириш;
• бутун боғда барча аҳоли учун тўсиқларсиз муҳит яратиш;
• марказий хиёбон бўйлаб тематик зоналарнинг жойлашиши;
• марказий ҳовузга киришни таъминлаш;
• кичик меъморий шакл қўшган ҳолда кўприкни янгилаш ва япон қўнғироғини янгилаш;
• фаввора бортларини пасайтириш ва ўриндиқларни қўшиш йўли билан одамлар кириши мумкин бўлган ҳолда реконструкция қилиш;
• болалар майдончасини экологик материаллардан фойдаланган ҳолда қайта қуриш;
• болаларни кутаётган ота-оналар учун ёпиқ дам олиш зоналарини ташкил этиш;
• йога учун ҳаффоф томли ёпиқ бостирмали зона яратиш;
• боғнинг бутун периметри бўйлаб айланма югуриш йўлакларини барпо этиш.

Қайта қуришдан кейин Сеул боғи, Тинчлик қўнғироғи ва Сиэтл боғи сақланиб қолади.

---

Қодирий боғи

Боғда рельефдан тўғри фойдаланиб, яшил ҳудудларни кўпайтириш, сайр ва томоша жойлари, фавворалар, янги планетарий қуриш, шунингдек, сайёҳларни жалб қилиш учун гастро-холл ташкил этиш режа қилинмоқда.

“Янги иншоотлар Чорсу бозори, умуман, эски шаҳар билан янада уйғун бўлади”, — дейилади президент матбуот хизмати хабарида.