XXI asrda xavfsizlik tushunchasi ancha kengaydi. Ilgari davlat xavfsizligi asosan chegaralarni qo‘riqlash, terrorizm va ekstremizmga qarshi kurash bilan chegaralanardi. Bugun esa tahdidlar ko‘lami kengaydi: sintetik narkotiklar, kiberjinoyatchilik, axborot makonidagi xurujlar, raqamli firibgarliklar har bir oila hayotiga ta’sir qilmoqda.

Tahlillarga ko‘ra, dunyoda yiliga 500 milliondan ortiq kiberhujum sodir etiladi. O‘zbekistonning o‘zida o‘tgan yili firibgarlik jinoyatlarining 36 foizi, o‘g‘rilik holatlarining esa 62 foizi aynan axborot texnologiyalari orqali amalga oshirilgan. Bu raqamlar masalaning dolzarbligi va uning hayotiy ahamiyat kasb etayotganini yaqqol ko‘rsatadi. O‘zbekiston taklif etgan tashabbuslar esa har bir fuqaro xavfsizligini ta’minlashga qaratilgani bilan muhim ahamiyat kasb etmoqda.

• Prezident tashabbusi – xavfsizlikda yangi bosqich

Prezident Shavkat Mirziyoyev SHHT Davlat rahbarlari kengashida xavfsizlik sohasida qator tashabbuslar bilan chiqdi. Ular orasida eng muhimlaridan biri – SHHT Mintaqaviy aksilterror tuzilmasi negizida Xavfsizlikka tahdid va xavf-xatarlarga qarshi universal markaz tashkil etish g‘oyasi bo‘ldi.

Bu markaz a’zo davlatlar o‘rtasida xavfsizlikka oid axborot almashishni yo‘lga qo‘yadi, qo‘shma tezkor tadbirlar va o‘quv mashg‘ulotlari o‘tkazadi, mutaxassislar tayyorlaydi va kiberhujumlar hamda terrorizmga qarshi kurashda yagona maydon vazifasini bajaradi.

• Deputatning qarashi

Oliy Majlis Qonunchilik palatasi deputati Jumanazar Otajonov ta’kidlaganidek, xavfsizlik masalasi endi siyosiy deklaratsiya yoki protokol emas – balki har bir inson hayotining bir qismi. Uning fikriga ko‘ra, yangi markaz orqali nafaqat davlat idoralari, balki oddiy fuqarolar ham o‘zini himoyalangan his qiladi.

Chunki xavfsizlikning asosiy mezoni – insonning o‘z uyida, ko‘chasida, telefoni orqali ham osoyishta hayot kechirishi. Bugungi raqamli asrda odamlarning shaxsiy ma’lumotlari, moliyaviy resurslari va hatto oilaviy osoyishtaligi ham internet xavflaridan himoya qilinishi shart.

• O‘zbekiston tashabbuslarining global ahamiyati

O‘zbekiston taklif qilayotgan tashabbuslar faqat mintaqaviy emas, balki global ahamiyatga ega. Chunki xavfsizlik muammosi bir mamlakat yoki bir hudud chegarasida qolib ketmaydi. Terrorizm yoki kiberhujumlar bir paytning o‘zida bir nechta davlatga ta’sir ko‘rsatishi mumkin.

Shu jihatdan universal markaz yaratilishi SHHT doirasidagi hamkorlikni yangi bosqichga ko‘taradi. Bu esa jahonda xavfsizlik va barqarorlikni ta’minlashda muhim mexanizm bo‘lib xizmat qiladi.

Jahon xavfsizlik tizimi kuchli sinovlar oldida turgan bir paytda O‘zbekistonning tashabbuslari – har bir inson hayoti bilan bog‘liq. Universal markaz orqali davlatlar birlashsa, terrorizm, ekstremizm va kiberjinoyatchilikka qarshi samarali kurashish imkoni yaratiladi.

SHHT xavfsizlik tashabbusi – inson hayoti va oila osoyishtaligini himoya qilishga xizmat qiladi.